Бонувони фаъоли ҲХДТ дар ноҳияи И. Сомонӣ аз Осорхонаи миллӣ дидан намуданд

29 ноябр занони фаъоли Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ дар доираи курси омӯзишии «Сарвариро меомӯзем» ба Осорхонаи миллии Тоҷикистон омада, бо осори ниёгон ва дастовардҳои даврони истиқлолият шинос гардиданд.

Тавре сардори шуъбаи экскурсионӣ ва оммавии Осорхонаи миллии Тоҷикистон Фаридун Кенҷаев ба хабарнигори АМИТ «Ховар» иттилоъ дод, меҳмононро шахсони масъули Осорхонаи миллии Тоҷикистон истиқбол гирифта, ба онҳо дар сатҳи баланди касбӣ сайри осорхонавӣ гузарониданд.

Сайри осорхонавии меҳмонон аз шуъбаи табиати Осорхонаи миллӣ шурӯъ гардида, ба меҳмонон оид ба мавқеи географии Тоҷикистон, иқлим, сарватҳои табиӣ ва конҳо, олами ҳайвоноту растаниҳо ва ҳудудҳои табиии махсус муҳофизатшавандаи Ҷумҳурии Тоҷикистон маълумот дода шуд.

Ҳамчунин дар ин шуъба бо олами ҳайвоноти Тоҷикистон тавассути диограммаҳои «Помир», «Баландкӯҳ», «Чилдухтарон», «Дашти Ҷум» ва «Бешаи палангон» шинос шуданд.

Меҳмонон дар шуъбаи таърихи бостон ва асрҳои миёна, бо бозёфтҳои «Саразм», толори «Оини Зардуштия», «Империяи Ҳахоманишиҳо», «Давлати Юнону Бохтар», «Империяи Кушониён», «Сосониён», «Панҷакенти қадим», «Бунҷикат», гӯшаи «Фарҳанги исломӣ», «Дайри Буддоии Аҷинатеппа», «Сомониён», толорҳои «Хушнависӣ» ва «Сиккаҳо» шинос шуданд.

Дар шуъбаи таърихи нав ва навтарин ҳаёти мардуми тоҷик дар солҳои 1917-1990 муаррифӣ гардида, дар толори «Истиқлолият»-и ин шуъба ба меҳмонон дастовардҳои мамлакат дар солҳои соҳибистиқлолӣ дар соҳаҳои маориф, фарҳанг, тандурустӣ ва варзиш муаррифӣ гардиданд.

Инчунин аз толори «Туҳфаҳои Президенти Ҷумҳурии Тоҷикистон», ки дар он ҳадяҳои аз ҷониби шахсиятҳои гуногуни ҷаҳонӣ ба Президенти Ҷумҳурии Тоҷикистон эҳдошуда ба маърази тамошо гузошта шудаанд, дидан намуданд.

Меҳмонон бо диққати махсус экспозитсияи Осорхонаи миллии Тоҷикистонро тамошо намуда, оид ба таърихи бой ва фарҳанги пурғановати миллати тоҷик маълумот пайдо намуданд.

Занони фаъоли Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ пас аз анҷоми сайри осорхонавӣ андешаҳои худро оид ба боздиди толорҳои намоишии Осорхона дар китоби «Меҳмонони фахрии Осорхонаи миллии Тоҷикистон» дарҷ намуданд.