Истеҳсоли маҳсулоти кишварзӣ 8 дарсад афзудааст

Вазири кишоварзӣ Қурбон Ҳакимзода зимни нишасти хабарӣ санаи 30 январ хабар дод, ки дар ҳамаи шаклҳои хоҷагидории ҷумҳурӣ ҳаҷми умумии маҳсулоти кишоварзӣ 49,3 млрд. сомониро ташкил дод, ки нисбат ба ҳамин давраи соли гузашта 8 фоиз зиёд мебошад, аз он ҷумла маҳсулоти растанипарварӣ ба 33,9 млрд. сомонӣ расонида шуда, 7,7 фоиз ва чорвопарварӣ 15,4 млрд. сомонӣ баробар гардида, 8,7 фоиз афзудааст. Дар ҳаҷми истеҳсоли маҳсулоти кишоварзӣ ҳиссаи маҳсулоти растанипарварӣ 68,8 фоиз ва чорвопарварӣ 31,2 фоизро ташкил дод.
Ҳамзамон вазир зикр намуд, ки ҷиҳати таъмини аҳолӣ бо сабзавоти тару тоза хоҷагиҳои ҷамъоавӣ ва деҳқонӣ дар давраи ҳисоботӣ аз майдони 100,5 гектар гармхонаҳои доимамалкунанда, тибқи маълумоти оморӣ ба ҳолати 01.01.2023 2969 тонна сабзавот, аз ҷумла 1324 тонна помидор, 1002 тонна бодиринг ва 643 тонна дигар намуди сабзавот истеҳсол ба бозорҳои истеъмолии кишвар пешниҳод намуданд, ки нисбат ба соли гузашта истеҳсоли сабзавот 586 тонна ё 24,6 фоиз зиёд мебошад.
Дар ин сол инчунин аз майдони 1481 гектар гармхонаҳои мавсимӣ 5,6 ҳазор тонна сабзавот истеҳсол гардида, ба бозорҳои истеъмолӣ пешниҳод шудааст.