Вазирони энергетикаи Тоҷикистон ва Русия масъалаи содироти маҳсулоти нафту газро баррасӣ намуданд Ноябрь 20, 2021 10:21

ДУШАНБЕ, 20.11.2021 /АМИТ «Ховар»/. 18 ноябр дар шаҳри Москва мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо Вазири энергетикаи Федератсияи Русия Николай Шулгинов баргузор гардид, хабар доданд ба АМИТ «Ховар» аз Вазорати энергетика ва захираҳои об.

Зимни мулоқот масъалаҳои марбут ба рушди соҳаи электроэнергетика, аз он ҷумла фаъолияти НБО Сангтӯда-1, ки дар асоси созишномаҳои байниҳукуматӣ бунёд гардидааст, фароҳам овардани имкониятҳои истихроҷи нафту газ дар қаламрави Ҷумҳурии Тоҷикистон ва инчунин вобаста ба идомаи ҳамкории судманд доир ба масъалаи воридоти маҳсулоти нафту газ аз Федератсияи Русия ба Тоҷикистон, инчунин як қатор масъалаҳои ҳамкории минбаъдаи ҳарду ҷониб дар ин ва дигар самтҳо мавриди баррасӣ қарор дода шуданд.

Зикр гардид, ки баҳри тавсеа ва ҳалли масъалаҳои дар рӯзномаи мулоқоти кории мазкур дарҷгардида, ки дар маҷмӯъ барои вусъатбахшии ҳамкории мутақобилан судманди бисёрҷониба байни ду кишвари ба ҳам дӯст равона карда шудаанд, минбаъд низ кӯшишҳо ба харҷ дода хоҳанд шуд.