Мири Мафтун, ба Афғонистон баргашт

Овозхон Мири Мафтун ду моҳи пеш пас аз суқути аксари вилоёти Афғонистон ба Душанбе омада, дар ин ҷо зиндагиву кор мекард. Ҳоҷӣ Малик Парвонӣ, рубобнавози Мири Мафтун дар таъйиди ин хабар ба Sputnik Тоҷикистон гуфт, овозхони маъруф дирӯз тасмим гирифт, ки ба Ватан баргардад.
"Ӯ хавотир аз фарзандонаш буд, ки дар Афғонистон монда буданд.Инчунин молу аъмолаш дар Афғонистон монда буд.
Мири Мафтун бори аввал соли 2013 бо даъвати Президенти Ҷумҳурии Тоҷикистон ба Тоҷикистон омада, барномаи консертӣ нишон дод. Мири Мафтун меҳмони ҳамешагии Тоҷикистон буд ва дар консерту ҷашнвораҳои гуногун иштирок мекард. Соли равон ӯ дар шаҳрҳои Душанбе, Ваҳдат ва Бохтар се консерти наврӯзӣ бо иттифоқи ҳамтоёни тоҷики худ иҷро кард.
Соли 2020 вазорати фарҳангу иттилооти Афғонистон ба ӯ унвони Устодро дод, ки бузургтарин арҷгузорӣ ба ҳунару истеъдоди як овозхон дар Афғонистон аст.
Бозгашти ӯ дар ҳолест, ки дар гузашта “Толибон”чанд маҳаллисароро дар Кандаҳору Бағлон ба шаҳодат расонида буданд. Ин гурӯҳ баробари вуруд ба Кобул фармон ҳам бароварда буд, ки аз ин ба баъд мусиқӣ дар Афғонистон қатъиян манъ аст.
Мири Мафтун ҳудуди 60 сол дошта, дар маркази вулусволии Ишкошим зиндагӣ мекунад ва асосан бо хондани сурудҳои маҳаллӣ маъруф гаштааст. Вай як писар дорад.