Ба зиёда аз як миллион сомонӣ оҳанпора фурӯхтаем

Раиси Кумитаи сармоягузорӣ ва идораи амволи давлатии Тоҷикистон гуфт, ки «Дар давоми соли 2015 аз тариқи музояда ба маблағи 1,1 миллион сомонӣ оҳанпора фурӯхта шудааст.

Қодири Қосим рӯзи 3 феврал ба хабарнигорон изҳор дошт, ки дар тӯли соли гузашта ба миқдори 1223,3 тонна пораву партовҳои металлҳои сиёҳ ва 55,7 тонна пораву партовҳои металлҳои ранга ба савдои музоядавӣ пешниҳод гардид ва ба маблағи дар боло зикршуда фурӯхта шуд.

Дар иттилоияе, ки дар бораи натиҷаи фаъолияти ин кумита дар соли 2015 пешниҳод шуд, омадааст, ки «ҷиҳати амалӣ кардани 13 лоиҳаи афзалиятноки давлати Тоҷикистон бо шарикони хориҷии барномаи рушд 22 созишномаи нав ба маблағи умумии 3,4 миллиард сомонӣ (447,1 миллион доллар), ба имзо расидааст.

Тибқи омори расмӣ, воридоти умумии сармоягузории хориҷӣ дар соли гузашта 7,6 миллиард сомонӣ (977,8 миллион доллар)-ро ташкил дод, ки нисбат ба соли 2014 ба миқдори 533 миллион сомонӣ (68,6 миллион доллар), аз ҷумла сармоягузории мустақим 726,5 миллион сомонӣ (93,5 миллион доллар) афзоиш ёфтааст.

Ба гуфтаи ин манбаъ, воридоти сармояҳои мустақими хориҷӣ бештар ба соҳаҳои омӯзиши геологӣ ва истихроҷи канданиҳои фоиданок, сохтмон, кишоварзӣ алоқа, саноат, хидматрасонии молиявӣ ва ғайра рост меояд.
©Солеҳ Юсуфов