Хушхабар

Толибшоҳи Давлат довталаби Ҷоизаи Нобел
Котиби масъали рӯзномаи “Ҷавонони Тоҷикистон”, рӯзноманигор ва нависандаи тоҷик Толибшоҳи Давлат бо повести “Турнаҳо дар баҳорон”-аш аз ҷониби Созмони муҳоҷирони тоҷик дар шаҳри Маскави Федератсияи Русия барои дарёфти Ҷоизаи Нобел дар соҳаи адабиёт пешбарӣ шудааст.
“Турнаҳо дар баҳорон”-и нависанда барандаи ду ҷоизаи байналмилалии дигар низ ҳаст. Қаблан дар озмуни “Новеллазия” барандаи ҷоиза ва мукофоти пулӣ гардид. Сипас, соли 2014 дар Ҳамоиши адабии кушодаи Осиёи Марказӣ (OCАBF-2014), ки дар он беш аз 450 нафар довталабон аз кишварҳои Осиёи Марказӣ, Русия, Британияи Кабир, Руминия, ИМА, Ирландия, Олмон, Туркия, Фаронса, Ҷопон, Укроин ва Гурҷистон ширкат варзиданд, беҳтарин асари бадеӣ эълон шуда, дар шаҳри Лондон ба забонҳои русӣ ва англисӣ нашр гардид.
Асар дар бораи сарнавишти пурмашаққати муҳоҷирони меҳнатии тоҷик дар Федератсияи Русия қисса мекунад. Ҳодисаҳо дар он реалӣ буда, муаллиф шоҳиди аксари онҳо будааст.
Умед дорем, ки Толибшоҳи Давлат дар ин озмуни сатҳи ҷаҳонӣ комёб шуда, номи Тоҷикистону адабиёти тоҷикро баландтар бардорад.
Ҳасан Азизов