Паём – Бахтномаи айём

Бо назардошти воқеияти кунунӣ ва бо мақсади пиёда сохтани супоришу дастурҳои Ҳукумати Ҷумҳурии Тоҷикистон бо сарварии Раиси муаззами ҲХДТ муҳтарам Эмомалӣ Раҳмон ҷиҳати рушди ҳунарҳои мардумӣ ва тақвият бахшидан ба он, ки аз нуктаҳои меҳварии Паёми навбатӣ ба мардуми кишвар бармеояд, тибқи нақша – чорабиниҳои Кумитаи иҷроияи Ҳизби Халқии Демократии Тоҷикистон дар шаҳри Хуҷанд дар ташкилоти ибтидоии «Маҳастии Хуҷандӣ» конференсияи илмӣ – фарҳангӣ таҳти унвони «Паём – Бахтномаи айём» баргузор гардид.
Занони фаъоли ҳизб шукргузорӣ аз Истиқлолияти давлатӣ ва иқдому тадбирҳои маънавиасосии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон ба ҳам омада, дар ҳошияи Паём намоиши ҳунарҳои мардумиро ба маърази тамошо гузошта, духтарону бонувонро ба меҳнатдӯстӣ ва касбу ҳунаромӯзӣ ҳидоят намуданд, зеро ба ақидаи Президенти Ҷумҳурии Тоҷикистон «Бо мақсади тараққӣ додани соҳаи сайёҳӣ, муаррифии шоистаи имкониятҳои сайёҳии мамлакат ва фарҳанги миллӣ дар арсаи байналмилалӣ, инчунин, ҷалби сармоя ва инфрасохтори сайёҳӣ пешниҳод менамоям, ки соли 2018 дар кишвар Соли рушди сайёҳӣ ва ҳунарҳои мардумӣ эълон карда шавад».
«Дар маҷмӯъ , дар ҳолати фароҳам овардани шароити мусоид баъзе аз ҳунарҳои миллии аз хотирҳо рафта, ки аҳён – аҳён дар зеҳну шуури модарону духтарони мо боқӣ мондааст, аз нав эҳё гардида, рушд ёфта, дар арсаи ҷаҳон барои муаррифии фарҳанги тоҷик хидмати шоиста хоҳад намуд», - иброз дошт дар баромади хеш мудири шӯъбаи кор бо занони Кумитаи иҷроияи ҲХДТ дар шаҳри Хуҷанд Зеварой Бобоева.