Президенти пешини Яман Алӣ Абдуллоҳ Солеҳ кушта шуд

Президенти пешини Яман Алӣ Абдуллоҳ Солеҳ дар натиҷаи задухӯрди мусаллаҳонаи ҷонибдоронаш бо шӯришгарони ҳусӣ кушта шуд. Ҳусиҳо то чанде пеш ҳампаймони Солеҳ буданд.
Намояндагони расмии Конгресси мардумӣ, ки онро Солеҳ раҳбарӣ мекард, гуфтанд, президенти пешини Яман дар натиҷаи як ҳамла дар ҷануби Санъо, пойтахти ин кишвар кушта шуд.

Раҳбари ҳусиҳо Абдулмалик ал-Ҳусӣ хабари кушта шудани Солеҳро "муҳим" номид. Вай гуфт, қасди ҳукумати Яманро ошкор кард, ки аз дастгириҳои эътилофи низомии ба раҳбарии Арабистони Саудӣ истифода мебурд.
Солеҳи 75-сола Яманро 30 сол раҳбарӣ кард. Ӯ соли 2012 дар натиҷаи эътирозҳои мардумӣ ва фишорҳои сиёсӣ аз мақомаш барканор шуд. Вале бо шӯришгарони ҳусӣ, ки Эрон аз онҳо пуштибонӣ мекунад, эътилоферо ташкил карда, шаҳри Санъоро то чанд рӯзи пеш идора мекард.
Шӯришгарони мавриди ҳимояти Эрон мегӯянд, Солеҳ ҳангоми сафар ба Арабистони Саудӣ кушта шудааст.
Ҷонибдорони Солеҳ то як ҳафта пеш ҳамроҳ бо ҳусиҳо зидди президенти кунунии Яман Абдраббуҳ Мансур Ҳодӣ меҷангиданд. Вале рӯзи чоршанбеи гузашта, миёни ҷонибҳо дар пайи ташаннуҷи тӯлонии сиёсӣ ва баҳсҳо атрофи масҷиди марказии Санъо, ки дар дасти шӯришгарон буд, задухӯрди мусаллаҳона сурат гирифт. Дар ин задухӯрдҳо дасти кам 125 одам кушта ва 240 тани дигар захмӣ шудаанд.