Иштироки Пешвои миллат Эмомалӣ Раҳмон дар Ҳамоиши сатҳи баланд дар мавзӯи “Таҳкими ҳамкорӣ ҷиҳати расидан ба рушди устувор дар шароити таҳдиду хатарҳои муосир”

/АМИТ «Ховар»/. Дирӯз дар Маҷмааи давлатии “Кохи Наврӯз” Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Ҳамоиши сатҳи баланд дар мавзӯи “Таҳкими ҳамкорӣ ҷиҳати расидан ба рушди устувор дар шароити таҳдиду хатарҳои муосир” иштирок ва суханронӣ намуданд.
Дар кори ин чорабинии муҳими байналмилалӣ Дабири кулли Созмони Милали Муттаҳид Антониу Гутерриш, роҳбарону намояндагони воломақоми дигар ташкилоту созмонҳои минтақавию ҷаҳонӣ, корпуси дипломатии муқими Душанбе ва коршиносону масъулони вазорату идораҳои дахлдори мамлакат ширкат доштанд.
Дар суханронии худ Сарвари давлат муҳтарам Эмомалӣ Раҳмон ташрифи Дабири кулли СММ ба Тоҷикистон ва баргузории Ҳамоиши сатҳи баланд дар мавзӯи “Таҳкими ҳамкорӣ ҷиҳати расидан ба рушди устувор дар шароити таҳдиду хатарҳои муосир”-ро имконияти бузург барои шиносоии бештар ва воқеӣ бо Тоҷикистон, ҳамчунин бо талошҳои Ҳукумати мо дар масири рушди устувор ва мавқеи қотеъонаи он дар арсаи мубориза бо мушкилоту хатарҳои муосир арзёбӣ намуданд.
Таъкид шуд, ки қабул гардидани Рӯзномаи ҷаҳонии рушди устувор то соли 2030 ба шароите рост омад, ки дар нуқоти гуногуни сайёра миллионҳо нафар мардуми осоишта ба хавфу таҳдид ва оташи ҷангу низоъҳои мазҳабиву геосиёсӣ дучор шудаанд ва яке аз ҳадафҳои аслии баргузории ҳамоиши имрӯза таҳкиму тавсеаи ҳамкориву шарикии бардавом ҷиҳати расидан ба ҳадафҳои рушди устувор ва пешгирии иқдомҳои муштарак ба хотири рафъи таҳдидҳои муосир ва таъмини сулҳу суботи пойдор мебошад.
Президенти Ҷумҳурии Тоҷикистон муҳтарам Эмомалӣ Раҳмон бо ёдоварӣ аз он, ки дар чунин вазъият ягон кишвари дунё ба танҳоӣ наметавонад дар арсаи мубориза бо хавфу таҳдидҳои амниятӣ комёб гардида, амну суботро таъмин намояд, дар сатҳи минтақа ва ҷаҳон пурзӯр кардани ҳамкориву ҳамёриро барои таъмини амнияти фарогир тавассути андешидани иқдомҳои дастҷамъона дар ҷодаи мубориза бо терроризму ифротгароии байналмилалӣ ҳамчун самти амалии раҳоӣ аз ин вартаи хавфнок муҳим арзёбӣ намуданд.

Омодагию ҳавасмандии Тоҷикистон ҳамчун аъзои фаъоли СММ барои тақвияти ҳамгироӣ бо кулли кишварҳои сайёра ва ниҳодҳои тобеи ин созмони муътабари ҷаҳонӣ, ки дар ин самт бояд нақши калидӣ ва ҳамоҳангсоз дошта бошанд, таъкид гардид.
Президенти Ҷумҳурии Тоҷикистон муҳтарам Эмомалӣ Раҳмон дар анҷоми суханронии худ бо ёдоварӣ аз ташаббусҳои ҷаҳонии Тоҷикистон дар роҳи ҳалли масъалаҳои обу экологии глобалӣ, изҳори умедворӣ намуданд, ки дар раванди татбиқи Даҳсолаи нави байналмилалӣ низ, ки ҳадафу вазифаҳояш ба нафъи тамоми мардуми сайёра мебошанд, аз ҳамкорию шарикии судманд бамаврид истифода бурда мешавад.
Дар идомаи Ҳамоиши сатҳи баланд дар мавзӯи “Таҳкими ҳамкорӣ ҷиҳати расидан ба рушди устувор дар шароити таҳдиду хатарҳои муосир” Дабири кулли Созмони Милали Муттаҳид Антониу Гутерриш суханронӣ намуда, ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ташкили чунин як чорабинии муҳим ва пайгирии масъалаҳои муҳиму ҳалталаби ҷаҳони муосир изҳори сипосу миннатдорӣ карданд.
Ҳамчунин дар рафти кори ҳамоиш Ҳамоҳангсози доимии СММ дар Тоҷикистон хонум Пратибҳа Меҳта, Вазири рушди иқтисод ва савдо Неъматулло Ҳикматуллозода ва дигар коршиносони дохилию хориҷӣ оид ба талошҳову дастовардҳои Ҳукумати Ҷумҳурии Тоҷикистон дар самти татбиқи Ҳадафҳои Рушди Устувор суханронӣ карданд.
Дар бахшҳои алоҳидаи ҳамоиш масъалаҳои Таъсири тағйирёбиии иқлим ба рушди Тоҷикистон ва Ҳадафҳои Рушди Устувор, Таъмини амнияти озуқаворӣ, Соҳаи кишоварзӣ ва амнияти озуқаворӣ дар Тоҷикистон:-мушкилот ва имкониятҳо барои татбиқи Барномаи миллии рушди Тоҷикистон то соли 2030 ва Ҳадафҳои рушди устувор ва ғайра баррасӣ гардид.