Иштироки 84 000 нафар дар Рӯзи Дави миллӣ

СУҒД. Санаи 21 май дар маркази вилоят чорабинии варзишии Дави миллӣ баргузор гардид, ки дар он Раиси вилояти Суғд Абдураҳмон Қодирӣ ва беш аз 15 ҳазор нафар сокинони касбу кори гуногун иштирок намуданд. Ин чорабинии варзишӣ имсол аз назди Маҷмааи ҳавзҳои шиноварии “20 солагии Истиқлолияти Тоҷикистон” оғоз ёфта, ба воситаи кӯчаи Сирдарё то назди Парчами давлатии Ҷумҳурии Тоҷикистон, воқеъ дар хиёбони ба номи Раҳмон Набиев идома ёфт. Дар оғози чорабинӣ сардори Раёсати ҷавонон, варзиш ва сайёҳии вилояти Суғд Олимҷон Зоҳидзода суханронӣ намуда, изҳор дошт, ки Рӯзи Дави миллӣ бо ташаббуси Президенти Ҷумҳурии Тоҷикистон мӯҳтарам Эмомалӣ Раҳмон бо мақсади таҳкими тарзи ҳаёти солим, рушду инкишофи соҳаи варзиш ва оммавияти он байни аҳолӣ аз соли 2007 инҷониб баргузор мешавад. Мавсуф ҳамчунин аз дастгириҳои пайвастаи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон нисбати ҷавонон ёдовар гардида, эълон гардидани Соли ҷавононро нишони боварии роҳбарияти олии мамлакат ба нерӯи созандаи ҷавонон арзёбӣ намуд. Сардори Раёсати ҷавонон, варзиш ва сайёҳии вилояти Суғд дар идомаи суханрониаш ба Раиси вилояти Суғд ҷиҳати дастгирии пайвастаи ҷавонон, махсусан варзишгарону ҷавонони соҳибистеъдод изҳори сипос намуд. Дар поёни чорабинии варзишӣ намояндагони фаъоли 15 муассисаву ташкилот бо тӯҳфаҳои хотиравӣ қадршиносӣ гардиданд. Ҷоиз ба таъкид аст, ки дар ҳамаи шаҳру ноҳияҳои вилоят Рӯзи Дави миллӣ баргузор шуд. Ба иттилои масъулини Раёсати ҷавонон, варзиш ва сайёҳии вилояти Суғд дар ин чорабинии варзишӣ беш аз 84 ҳазор нафар сокинони вилоят фаъолона иштирок намуданд.