Маҷмааи варзишӣ барои ҷавонон

Бо ташаббуси ташкилоти ҳизбии «Иттифоқ», намояндагони Ҳизби Халқии Демократии Тоҷикистон дар Федратсияи Россия, ҷалби соҳибкорони ватанӣ дар ин кишвар ва ҳамчунин бо ҳамкории намояндагони ТҶҶ «Созандагони Ватан» дар Федратсияи Россия дар деҳаи Тайланободи ҷамоати Лоҳури ноҳияи Рӯдакӣ маҷмааи варзишӣ бо фаро гирифтани 200 нафар тамрингирандагон сохта ба истифода дода шуд.
Чунин иқдомҳои ватандӯстона пеш аз ҳама саҳм гузоштан дар созандагию бунёдкории ватани маҳбуб ва дар амал татбиқ намудани дастуру супоришҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти оммавигардонии тарбияи ҷисмонӣ ва варзиш ба роҳ монда шуда, инчунин барои фароҳам овардани шароити муносиби рушди зеҳнию ҷисмонӣ барои ҷавононе, ки дар деҳот зиндагӣ доранд ва дар маҷмуъ таблиғу тарбияи ватандӯстӣ дар замири ҷавонон маҳсуб мегардад.
Дар маросими кушодашавии ин маҷмаа роҳбари Дастгоҳи иҷроияи марказии Ҳизби Халқии Демократии Тоҷикистон Абдураҳмон Хонов, роҳбари Ташкилоти ҷамъиятии ҷавонон «Созандагони Ватан» Абдулло Раҳмонзода ва раиси кумитаи иҷроияи «Иттиҳод» Саидбек Мирзомуддинов суханронӣ намуданд.
Қайд гардид, ки варзиш беҳтарин василаи муаррификунандаи давлату миллат дар замони муосир ба ҳисоб рафта, ба ин васила ҷаҳон аз фарҳанг, таърих ва тамаддуни он шинохта мешавад. Ҳизби Халқии Демократии Тоҷикистон минбаъд низ кӯшиш ба харҷ медиҳад, ки бо ҷалби аъзои фаъоли ҳизб чунин иқдомҳоро роҳандозӣ намояд. Ҳамин тавр, пас аз ба фаъолият шурӯъ намудани маҷмааи варзишӣ мусобиқа аз рӯи намуди гуштини миллӣ доир карда шуда, ғолибон бо диплому туфаҳо қадрдонӣ гардиданд.
Гулҳаёи Мадимар