Ифтихори мо

Яке аз 25 нафар иштирокчиёни ҶБВ, ки имрӯз дар ноҳияи Деваштич дар қайди ҳаёт ҳастанд, Уктам Мирзоаҳмадов 90 сола шуд. Ба ин муносибат соҳибҷашн аз ҷониби Раиси вилоят қадрдонӣ шуданд.

Бо гузашти ҳар як рӯз сафи падарони шуҳратманд, ки роҳҳои пуроташро дар солҳои ҶБВ тай кардаанд, кам мешаванд. Аз ҷумла, аз сафи 2400 нафар мардони шуҷои ноҳияи Деваштич, ки сарбаландона аз ҷанг баргашта буданд, имрӯз хамагӣ 25 нафар дар қайди ҳаёт ҳастанд. Аз ин рақам боз чанд нафарашон ранҷи болини бистарӣ мекашанд.

Аз ҷумла, имрӯз дар деҳаи Лолазори ҷамоати деҳоти Яхтани ноҳияи Деваштич алҳол 6 нафар истифода аз ғамхориҳои пайвастаи Асосгузори сулҳу Ваҳдати миллӣ, Пешвои миллат Эмомалӣ Раҳмон умр ба сар мебаранд. Яке аз онҳо Уктам-амак Мирзоаҳмедов навадсола шуд. Ин падари зиндадил панҷ сол дар хизмати Модар-Ватан буду пас аз Ғалаба ҳам 9 моҳ пою пиёда дар роҳҳои Манчурияю Муғлистон ва Хитой ранҷ кашида, то лонаи милитаристони Ҷопон расидааст. Аз майдони набардҳо бо чанд ордену медалҳо баргашту тамоми умри хешро ба рушти кишоварзию чорводорӣ бахшид. Деҳқони одди шуд, сарварии бригадаро ба уҳда гирифт, мудири фермаи чорводорӣ шуд. Дар замони меҳнати осоишта ҳам чанд нишонҳои сарисинагию Ифтихорномаҳо гирифт. Имрӯз Уктам-амак истифода аз дастуру супоришҳои Савари давлат ба майдони 5 гектар хоҷагии деҳқони таъсис додаасту ҳамроҳи фарзандону набераҳо баҳри таъмини Барномаи озуқавории мамлакат саҳм мегирад.
Ана ҳамин марди шариф навадсола шуд. Ба ин муносибат намояндагони роҳбарияти вилоят барои табрикаш омаданду Номаи табрикии Раиси вилоят Абдураҳмон Қодириро бо туҳфааш ба соҳибҷашн тақдим намуданд. Дар ҷавоби чунин ҳурмату эҳтиром Уктам Мирзоаҳмадов барои сулҳу осоиштагӣ, ободии ватан даст ба дуо кушод.