Дарёфти муҳимоти ҷангӣ аз деҳаи Симиганҷ

Вазорати корҳои дохилии Тоҷикистон мегӯяд, 7-уми марти соли равон дар деҳаи Симиганҷи ноҳияи Ваҳдат аз тарафи Фарзонаи Қурбон, соли таваллудаш 2003, хонандаи синфи 6-уми мактаби миёнаи таҳсилоти умумии №55-и деҳаи Симиганҷи ноҳияи мазкур дар марғзор оиди дарёфти силоҳу лавозимоти ҷангӣ ахборот гирифтаанд.

Бино ба иттилои манбаъ, Падари Фарзона полковники милитсия Ибрагимов Қ.Б. оид ба ин масъала фавран ба ШВКД дар ш.Ваҳдат хабар дода, гурӯҳи оперативӣ-тафтишотӣ ба ҷойи ҳодиса ҳозир шуда, гранатамёт (бисёристифодашаванда) ва лавозимоти ҷангии зиёдро мусодира ва ба Вазорати корҳои дохилӣ пешниҳод намуданд.

Барои зоҳир намудани зиракиву ҳушёрӣ ва ҳисси баланди ватандӯстию ватанпарастӣ Фарзонаи Қурбон аз ҷониби Вазири корҳои дохилӣ генерал-лейтенанти милитсия Раҳимзода Рамазон Ҳамро бо мукофоти қимматноки «Ноутбук» ва падараш Ибрагимов Қурбонбег Бовобекович бо «Ифтихорнома»-и Вазорати корҳои дохилии Ҷумҳурии Тоҷикистон ва модараш Оева Гулнора Саидовна бо «Раҳматнома» сарфароз гардонида шуданд.

Гуфта мешавад, ки ҷавононе, ки барои дарёфти силоҳ кӯмаки худро расонидаанд, минбаъд барои дохил шудан ба Донишкадаҳои мақомоти корҳои дохилии Ҷумҳурии Тоҷикистон ва дар хориҷи кишвар дорои имтиёзҳо мебошанд.