Ба истифода додани бинои Қасри фарҳанг дар ноҳияи Фархор

02.10.2021 11:06, ноҳияи Фархор

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Хуррамзамини деҳоти Фархор бинои Қасри фарҳангро мавриди баҳрабардорӣ қарор доданд.

Аҳли фарҳанг Пешвои муаззами миллатро самимона истиқбол гирифта, барои ин ҳадяи бебаҳо изҳори миннатдорӣ намуданд.

Бинои хуштарҳу замонавии Қасри фарҳанг бо истифода аз санъати баланди меъморӣ бунёд гардида, дар он барои кору фаъолияти дастаҳои ҳунарӣ, кормандони бахши фарҳанги ноҳия, баргузории ҳамоишу барномаҳои фарҳангӣ шароити зарурии замонавӣ фароҳам оварда шудааст.

Толори асосии бино дорои 400 ҷойи нишаст буда, имконият фароҳам меорад, ки ҳамоишу чорабиниҳои гуногун ва барномаҳои консертӣ минбаъд дар ҳамин ҷо гузаронида шавад. Толор бо истифода аз санъати баланди мемъорӣ ва усули хоси гаҷкорӣ оро ёфта, он бо қандилҳои калонҳаҷми зебо ва дигар ороишот зинат ёфтааст. Барои ороиши дохили толор санъати баланди меъмориву наққошӣ истифода гардида, саҳна бо дастгоҳҳои замонавии равшанидиҳӣ ва тақвияти овоз таъмин гардидааст.

Ҳуҷраҳои алоҳида барои ивази сару либос ва пардозгарӣ бо тамоми лавозимоти зарурӣ сохта шудааст.

Ба Роҳбари давлат иттилоъ доданд, ки иншоот ҳамчунин дорои 14 адад утоқи барҳавою замонавии корӣ буда, дар дохили Қасри фарҳанг толорҳои хурди тамринӣ низ ташкил гардидааст. Барои гузаронидани маҳфилу омӯзишҳои касбӣ ва густариш додани малакаи наврасони соҳибиcтеъдод дар бинои мазкур имкониятҳои зарурӣ фароҳам мебошад.

Дар доираи дастуру супоришҳои Роҳбари давлат муҳтарам Эмомалӣ Раҳмон ҷиҳати равнақ додани фарҳанги китобдориву китобхонӣ, дар дохили Қасри фарҳанг китобхонаи муосир ташкил гардидааст, ки хоҳишмандон метавонанд аз он ба таври доимӣ истифода баранд. Китобхона дорои беш аз 2 ҳазор нусха адабиёти гуногун мебошад.

Намои берунаи Қасри фарҳанг бо санъати баланди меъморӣ бунёд гардида, саҳни ҳавлии иншоот пурра сафолакпӯш карда шудааст. Ҳамчунин ҳудуди қасрро фаввораҳои зебо зинат медиҳанд ва барои истироҳату дилхушии кӯдакон дар назди иншоот боғи кӯдакона ташкил гардидааст.

Қасри фарҳанг дар доираи тантанаҳои идона бахшида ба 30-солагии Истиқлолияти давлатии Ҷумҳурии Тоҷикистон сохта ба истифода дода шуд ва ба ҳамин васила барои аҳли фарҳанг шароити мусоиди корӣ фароҳам гардид.