Шиносоӣ бо шароити таълим дар Муассисаи таҳсилоти миёнаи умумии №56 барои кӯдакони лаёқатманд дар ноҳияи Вахш

16.08.2017 11:38, ноҳияи Вахш


Дар доираи сафари кории худ ба шаҳру ноҳияҳои вилояти Хатлон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Вахш бо шароити таълим дар Муассисаи таҳсилоти миёнаи умумии рақами 56 барои кӯдакони лаёқатманд, ки аз таъмири асосӣ бароварда шудааст, шинос шуданд.

Барои пурра аз таъмир баровардани мактаб наздики 4 миллион сомонӣ маблағ сарф гардидааст, ки он аз ҷониби як гуруҳ шахсони саховатпешаи ноҳия, аъзоёни Ҳизби Халқии Демократии Тоҷикистон бо ҷонибдорӣ аз сиёсати созандаи Пешвои миллат амалӣ карда шудааст. Корҳои сохтмонӣ аз тарафи Ҷамъияти дорои масъулияти маҳдуди “Оби ҳаёт” моҳи декабри соли 2016 оғоз гардида, моҳи августи соли 2017 пурра мавриди баҳрабардорӣ қарор дода шуд.

Дар мактаб 1100 нафар хонанда дар ду баст таҳсил мекунад ва он аз 30 синфхона ва утоқҳои кории муаллимон иборат мебошад.

Бинои муассисаи таълимии рақами 56 пурра ба талабот ҷавобгӯ набуд ва аксари синфхонаҳои он дар ҳолати садамавӣ қарор дошт. Дару тиреза, девор, фарш ва шифти мактаб таъмирталаб гардида буд ва бо дарназардошти ин соҳибкорони ноҳия иқдом пеш гирифтанд, ки онро аз таъмири асосӣ бароварда, барои фарзандони сокинони ноҳия як шароити созгори таълим фароҳам оранд.

Баъди иҷрои корҳои таъмиру таҷдиди мактаб шароити таълиму ҳунаромӯзӣ дар синфхонаҳои фаннӣ, озмоишгоҳҳо, сехи ҳунаромӯзӣ, синфи технологияи компютерӣ, китобхона бо 4 ҳазор адад китобҳои фаннию бадеӣ, китобхонаи электронии пайваст ба шабакаи умумиҷаҳонии интернет, толори варзишӣ бо 100 ҷойи нишаст, маҷлисгоҳ бо 120 ҷой ва ошхона, ба талаботи замони муосир ҷавобгу гардид.

Ба Муассисаи таҳсилоти миёнаи умумии рақами 56 барои кӯдакони лаёқатманд аз ҷониби Кумитаи кор бо занон ва оилаи назди Ҳукумати Ҷумҳурии Тоҷикистон баҳри ҳунаромӯзии духтарон 10 адад мошинаи дарздузӣ тақдим карда шуд.

Пас аз шиносоӣ бо корҳои таъмиру таҷдид дар мактаб Президенти мамлакат муҳтарам Эмомалӣ Раҳмон ба шахсони хайрхоҳ, ки ба хотири дар амал татбиқ кардани сиёсати башардӯстонаву бунёдкоронаи роҳбарияти давлат ва Ҳукумати ҷумҳурӣ ин амали некро анҷом додаанд, изҳори сипос карданд.

Баъди шиносоӣ бо шароити таълим дар Муассисаи таҳсилоти миёнаи умумии рақами 56 барои хонандагони лаёқатманд Пешвои миллат муҳтарам Эмомалӣ Раҳмон ба 330 нафар кӯдакони маъюб ва ятими кулл аз ҳисоби Фонди захиравии Президенти Ҷумҳурии Тоҷикистон дар ҳаҷми 500 ҳазор сомонӣ кӯмаки моддию молиявӣ, аз қабили аробачаҳо барои маъюбон, дучархаҳо, сару либос, маводи ғизоӣ, шириниҳо ва кумаки молиявӣ тақдим карданд.

Мавриди зикр аст, ки чунин кумакҳои моддию маънавӣ ба табақаҳои эҳтиёҷманд аз ҷониби Сарвари давлат муҳтарам Эмомалӣ Раҳмон ҳамеша расонида мешавад, ки дар беҳдошти сатҳи иҷтимоии ниёзмандон мусоидати амиқ менамояд.