Гӯшаи Тоҷикистон дар ITB Berlin кушода шуд

Субҳи рӯзи, 9 март, Намоишгоҳи байналмилалии туристии ITB Berlin оғоз шуд, ки то 13 март идома меёбад.

Гӯшаи Тоҷикистон бо ширкати Ҳабибулло Амирбекзода, муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, роҳбари гурӯҳ, Маликшо Неъматов, Сафири фавқулодда ва мухтори Ҷумҳурии Тоҷикистон дар Олмон ва намояндагони ширкатҳои туристӣ кушода шуд.

Ба гуфтаи Ҳ. Амирбекзода, Тоҷикистон 9 сол мешавад, ки дар ин чорабинии бонуфуз ширкат мекунад. Мақсад бо муаррифии захираҳои туристии кишвар роҳ ёфтан ба бозори ҷаҳонии туризм, пайдо кардани ҳамкорони нав аз ҷумлаи ширкатҳои туристии дигар давлатҳо ва ҷалби сайёҳон ба Тоҷикистон мебошад.

Тоҷикистонро дар ин намоишгоҳ ширкатҳои туристии “Саёҳати Тоҷикистон”, “Сайру саёҳати кӯҳӣ”, “Ҷавоҳир”, “Ором саёҳат”, ширкатҳои сайёҳии Бадахшон ва Ширкати ҳавопаймоии “Сомон Эйр” муаррифӣ мекунанд.

Ҳамчунин, имрӯз дар доираи намоишгоҳ ҷаласаи вазирони кишварҳои Роҳи бузурги Абрешим доир гашт. Дар он намояндагони кишварҳо, раиси Ташкилоти ҷаҳонии туризми СММ Толиб Рифоӣ ширкат доштанд. Дар ҷаласа масъалаҳои соҳаи туризм дар минтақаи Роҳи Абрешим баррасӣ шуд.