Дар эътирози сартосарии Венесуэла ду одам кушта шуд

Фаъолияти мағозаҳо ва гардиши нақлиёт дар чандин шаҳри Венесуэла қатъ гардид. Дар кӯчаҳо сангар гузошта шуд. Ҳаёт дар ноҳияи Каракас, ки паноҳгоҳи мухолифон номида мешавад, қариб, ки аз гардиш боз монда буд. Пулис зидди эътирозгарон аз гази ашковар истифода бурд.
Талаби асосии мухолифон - қатъи тасмими тағйири Конститутсия аз сӯи ҳукумати Николас Мадуро буд. Мухолифон ҳамчунин барқарории озодиҳои сиёсӣ ва ба эътидол овардани вазъи дарёфти ғизову дорувориро талаб карданд.

Николас Мадуро 30 июлро рӯзи раъйпурсии умумихалқӣ эълон кардааст. Ин раъйпурсӣ тағйири Конститутсияро бо ҳадафи густариши салоҳиятҳои ҳукумати иҷроия ва кам кардани салоҳиятҳои порлумон дар назар дорад. Аксари курсиҳои порлумон дар ихтиёри мухолифон аст. Қисме аз кишварҳои Созмони давлатҳои Амрико аз Мадуро даъват карданд, ки раъйпурсии мазкурро доир накунад. Агар Мадуро тасмимашро иваз накунад, ИМА зидди Венесуэла таҳрим ҷорӣ мекунад.

Ба гуфтаи намояндагони мухолифон, 85 дарсади аҳолии қобили кори кишвар дар эътирозҳои ахир ширкат кардаанд. Аммо Мадуро мегӯяд, "садҳо ва садҳо корхонаҳо сад дарсад фаъолияташонро идома доданд".