Соҳаи тандурустӣ рушд дорад

Дар соли 2016 барои соҳаи тандурустии ВМКБ маблағи 57984622 сомонӣ пешбинӣ гардид, ки нисбат ба соли гузашта 12 дарсад бештар аст. Баробари он ки сокинони Бадахшон аз 348 муассисаи шифоию пешгирӣ истифода мебаранду ағлаби онҳо солҳои истиқлолият бунёд ёфтаанд, боз соли ҷорӣ ба хотири ҷараён бахшидан ба модули тибби оилавӣ дар вилоят таъмир ва азнавсозии 35 муассисаи кӯмаки аввалияи тиббию санитарӣ дар назар аст. Дар нимсолаи аввали соли ҷорӣ фавти кӯдакони аз 1 то 5 сола нисбат ба нимсолаи аввали соли 2015 7 нафар камтар аст. Имсол як ҳодисаи фавти модар ба қайд гирифта шуд, ки нисбат ба ҳамин давраи соли 2015 2 нафар камтар аст. Дар даврони истиқлолият дар вилоят беш аз 30 маркази гуногуни тиббӣ ба фаъолият оғоз намуданд. Имрӯз беморхонаи марказӣ ва Маркази ташхис бо ҷадидтарин таҷҳизоти замонавӣ муҷҷаҳҳазанд, ки ҳатто як қисматашон дар беморхонаҳои пойтахти ҷумҳурӣ низ вуҷуд надоранд.