«Омӯзиши таърихи ниёгон»

Бо тавсияи Кумитаи иҷроияи Ҳизби Халқии Демократии Тоҷикистон дар вилояти Суғд дар ташкилоти ибтидоии ҳизбии Маркази назорати давлатии санитарию-эпидемологии ноҳияи Деваштич аксияи омӯзиши китоби «Тоҷикон дар оинаи таърих»-и Асосгузори сулҳу ваҳдати миллӣ, Пешвои миллат, Эмомалӣ Раҳмон гузаронида шуд.

Дар маҷлисгоҳи ташкилоти ҳизбии МНДСЭ дар доираи ҷашнгирии Рӯзи Ваҳдати миллӣ ва 25-солагии Истиқлолиятии давлатии Ҷумҳурии Тоҷикистон аъзоёни ҲХДТ аз китоби «Тоҷикон дар оинаи таърих» маърузаҳо омода карданд. Раиси ташкилоти ибтидои ҳизб Абдуманнон Баҳронов аксияи мазкурро оғоз бахшида, дар тақвияти худшиносӣ ва ҳувияти миллӣ, арзишҳои ватандорӣ, таблиғу ташвиқи дастовардҳои мамлакат, тарбияи насли наврас ба рӯҳияи ватандӯстиву меҳанпарастӣ сухан карда, қайд намуд, ки «Истиқлолиятро соҳиб шудан ҳанӯз кам аст, онро ҳифз намудан, пуштибонӣ кардан, тақвият бахшидан ва ҳамчун арзиши муқаддастарини давлату давлатдорӣ дарк намудан ва пос доштан зарур аст. Истиқлолият ин шарафу номуси ватандорӣ, ифтихор аз давлату миллати хеш ва талошу заҳмати бардавоми ҳар як фарди бедордили ҷомеа баҳри худшиносӣ, маърифат ва фарҳанги волост. Истиқлолият ин хонаи обод, рӯйи сурх, сари баланд, зиндагии осоишта ва рӯзгори осудаҳолонаи ҳар фарди соҳибдавлату соҳибватан аст». Ин гуфтаҳо маҳз дар китоби Пешвои миллат «Тоҷикон дар оинаи таърих» таҳким ёфта, дар натиҷаи омӯзиши он ҳар як сокини мамлакат дар фикру дили худ эҳсоси ифтихори ватандориву хештаншиносиро пайдо мекунад.

Дар тақвияти суханони боло корманди ташкилоти ҳизбӣ Ҷамшед Бурҳонов баромад карда, қайд намуд, ки омӯзиши китоби «Тоҷикон дар оинаи таърих»-и Асосгузори сулҳу ваҳдати миллӣ, Пешвои миллат, Муҳтарам Эмомалӣ Раҳмон барои ҳамагон айни муддаост. Зеро имрӯз ҷаҳонро хатарҳои гуногун фаро гирифтааст ва баҳри пешгирии вабои аср мисли терроризму ифротгароӣ ва роҳ надодани шомилшавии ҷавонон ба ҳизбу ҳаракатҳои ғайриқонуниву экстремистӣ омӯзиши китоби мазкур бояд васеъ ба роҳ монда шавад. Ҷамшед Бурҳонов инчунин зикр намуд, ки дар баробари Раиси ҲХДТ, Пешвои миллат, мӯхтарам Эмомалӣ Раҳмон ҷиҳати муҳайё намудани шароити арзандаи зист ва таҳкими иҷтимоиёти давлат мардуми шарафмандаш низ саҳми босазои худро гузорад, зеро танҳо деҳқон натиҷаи самараи меҳнати худро ҳамчун гавҳараки чашм эҳтиёт менамояд.